Rev 11 | BEF | STEP | To agelo moneuba akepa osahi molo legege huse osaha suhi huto nonimito ma luto nimi'ehina: Kai ho tito Hu'mamofihi sipi mono nohi mamufa gilata hita hiti molo legege huto komopa'agu Hu'mamofihi enalapusa fi emise nehana'a leka sobo.

Revelation of John 11

Hu'mamofihi ka'a lu huto huto bomale'ititihi ka'a

1 To agelo moneuba akepa osahi molo legege huse osaha suhi huto nonimito ma luto nimi'ehina: Kai ho tito Hu'mamofihi sipi mono nohi mamufa gilata hita hiti molo legege huto komopa'agu Hu'mamofihi enalapusa fi emise nehana'a leka sobo. 2 To sipi mono nopofihi feguto hepa'a ya'ma molo legege huto be megose fa'mene he'mibo. Yamofihi notoga bona'magi Hu'mamofihi ka mekehelilata enali'i yabe luto fi laga huto he'mi'ohuna ni'ibe. Enali lamana hepato Yelusale'i ya'ma ikahi 42 yamofihi komopa'agu bila ela hite ika ika hite minaluna'mu yabe. 3 To nani ka'ni lu huto bo loemo lu etiminogo'ni gukete tafa'a li hekele'ehite bona'ni ya'ma ka'ni lu epi epi hite nehinogo ana foyamofihi kana'a ikahi 42 o belenogo su halina'mu yabe.

4 Etali oliba yafa loemo to libi'i loemo ya'ma me'mofihi Sipi Bo'a ai bulo ho tilete minete ya suhi hite neha'ibe. 5 Bo moneubafi moneuba luba li etimilina ya'ma etabagaguti logomofihi kele'auba ikalafu ito lalube'mu hibe. Ya suhi huto bo moneubafi moneuba luba etahalinamoya ai'a nukuma'i nalina'mu yabe. 6 To etali etubugilo kaba hila'inamofihi amuya etimi'ehina ni'inagihe. Hu'mamofihi kaga'a lu yege hete neha'inogo kokuluma hekini lo eto'aha'igo ko'i meilina'mu yabe. To asaga gulu gulu nagami'i kaba hite amuya'a hiti ya'ma etimi'ehinamo ni'igo etali ana nagami'i golaha lolo hi etala'ibe. To melugu silaga'na gumi'i halina'a huto hilibe lite etegekesagu kehelilete li'inogo huto hilina'mu yabe.

7 To mono ka lu yege hala'ina kana'a su holenogo yatama keliguti luba yagakafa tilina'mu yabe. Tiloto luba etoho etebe ligito etehelenogo filila'ina'mu yabe. 8 Filile'inogo bona'i etali etugufa'atiti he'mile'inogo hepa'i sipi lamana'alo kapogu kete minala'ina'mu yabe. Sipi Bo'atitimofihi ya'ma ana hepato koyapa'i malipu yafalo helago fili'ehina hepa'mofihi ya'ma gi'a fono kamofihi ka'aguti Sotomu to Iyipi yabe, lite lilata nehabe. 9 Ya hilenogo noto noto bona'i luga'amagi suhi huto naga'i fato fato'i to nogo'ani fato fato'i to enugufa'a fato fato'i silaga'i ya'ma etugufa'atitimofihi kana'a loebe monebe to nekisa'a ya'magu be etegelete minalana'mu yabe. Ya nehinogo luga'amagi keli halune lite linogo o'e lite lu laga hilana'mu yabe. 10 To ana mono ka leli'ali bole loemo etali melugu bona'i ya'ma enagabu gi epolose nasana sipi epilata hi'aha'inamo ni'inagi fili'aha'ina'mu yabe lite enegelo bite nose'na li nupa hite guna ite li muyalo malo hilana'mu yabe. 11 To kana'a loebe monebe to nekisa'a su nehenogo Hu'mamofitogati kosaba amuya li huto hulata nohina sikalafu'uba limito etugufagu tinogo mopo hite ho tila'ina'mu yabe. Ho tile'inogo bona'magi be etegelete enefelele aku'i bilenogo topa hete koli sipi hi'ahana. 12 Ya hulenogo kokulumaguti nogo'a sipi moneuba ya'ma luto lu etimi'ehina: Etali malo tiliyo linogo fateha'atitimagi enali be etege'ehinogo sopohi gupisalo kokulumagu ti'aha'ina yabe. 13 To ana yupahi kokulumagu tite nemina'igo ana'asi imima'i sipi li'ehina. Noligo ana hepa'i luga'a sibina hu su nohago hepa'i luga'a 9 fa'mene mino'ehina. To bona'i 7 tauseni fili su he'ahana. To enubu hiti minalana'amagihi sipi enelesa nelinogo Hu'mau kokuluma afo'afihi gi'a liyafa hinogo bati hite minalune'mu habe.

14 Oho, keta'a hiti liginaga fise'na loemo ya'ma alo'i huto hu su ho'ehibe. Kehelilo. Ma'asi aku'i mone keta'a hiti ya'ma huto hilube'mu nohibe.

Pikuli napa 7 fu li'ehina

15 Ya hulago agelo napa 7 ai pikuli fu noligo kokulumagu ya'ma enonogo sipi melete ma lite li'ahana: Yatai ya'ma noto noto bona'magihi kaba hulatanamofihi amuya'amoya Sipi Botimofihi to le'mo ho ti'ehina'amofihi ai yanagu nohigo kaba hu epoloto mino'ehina. Yatai enigihiti bo lolo hilibe luto linogo mino lito buto minalube'mu hibe. 16 Ya lite lilago olopa kaba bona'i luga'a 24 Hu'mamofihi bulo sekele mamu'a hiti kefa hisa'anilo nehanamagi limite enalapusa fi emite Hu'mamofihi ma lite fokehi li'ahana: 17 Sipi Bo, Hu'mau enebe ligi'ehina ai koyapa'i mino'ehina to yatai nohuna bo. Lali kai'i kofokehi ya'ma luto nohone: Kai amuyaka sipi lita lo'ahanago huto nohibe. Ya huloto kigibina bo minoto kaba hu epololata foya hapi fito li huto nohane. 18 Ya hulatogo noto noto bona'i komopa'anigu logo nobinamo ni'ibe. Kai kipakafa halina huto hilina kana'a alo'i tupa nohibe. Fili'ahana bona'i enali foipana'animu ka foya li epalalata kana'a huto hu'ehibe. To kele kele yagapanaka mono ka leli'ali bona'i to bonakamagi asaga'i amuya keheli'ahana sipi nehana'a hiti lagaso'a bona'i asaga agoya hu kimi'ahana, enali mina'a epilata kana'a tupasi nohibe. To metoga nasana li sibina hilata nehana bona'i enali'i ya'ma enele'mo sibina hu epalalata kana'a hiti mone'na hupamone nohibe.

19 Enali ya lite fokehi lilago kokulumatoga Hu'mamofihi sipi mono noha'a hokolo hulago lu mu tifise'namofihi kaga'a bokisi yamofihi sipi mono nohi komopa'agu huto hu'ehina. To kopisi'na li melebeya nohigo to nogo'ani nela to kokililika babu nolina to imima'i noligo sipi ko'i hogisopa legeya'a i'ehina yabe.